Judg 10 | NdeIBE | STEP | Ngemva kwezinsuku zika-Abhimelekhi kwavela umuntu wako-Isakhari, uThola indodana kaPhuwa, indodana kaDodo ukuba ahlenge u-Israyeli. Wayehlala eShamiri, elizweni lezintaba elako-Efrayimi.

Judges 10

UThola

1 Ngemva kwezinsuku zika-Abhimelekhi kwavela umuntu wako-Isakhari, uThola indodana kaPhuwa, indodana kaDodo ukuba ahlenge u-Israyeli. Wayehlala eShamiri, elizweni lezintaba elako-Efrayimi. 2 Wakhokhela u-Israyeli iminyaka engamatshumi amabili lantathu; wasesifa, wangcwatshwa eShamiri.

UJayiri

3 Walandelwa nguJayiri owaseGileyadi, owakhokhela u-Israyeli iminyaka engamatshumi amabili lambili.

4 Wayelamadodana angamatshumi amathathu, ayegada obabhemi abangamatshumi amathathu. Ayephethe amadolobho angamatshumi amathathu eGileyadi, lalamhlanje abizwa ngokuthi Havothi Jayiri.

5 Ekufeni kwakhe uJayiri wangcwatshwa eKhamoni.

UJefitha

6 Abako-Israyeli benza okubi futhi emehlweni kaJehova. Bakhonza oBhali labo-Ashithorethi, labonkulunkulu base-Aramu, labonkulunkulu baseSidoni, labonkulunkulu baseMowabi, labonkulunkulu bama-Amoni, kanye labonkulunkulu bamaFilisti. Ngenxa yokuthi abako-Israyeli bamdela uJehova kabaze babe besamkhonza,

7 wabathukuthelela kakhulu. Wabanikela ezandleni zamaFilisti lama-Amoni, 8 okwathi ngalowomnyaka abachitha abanqoba. Acindizela abako-Israyeli bonke iminyaka elitshumi lesificamibili ngasempumalanga kweJodani eGileyadi, ilizwe lama-Amori. 9 Ama-Amori futhi achapha iJodani ukuba alwe loJuda, loBhenjamini kanye lendlu ka-Efrayimi; u-Israyeli wayephakathi kohlupho olukhulu.

10 Lapho-ke abako-Israyeli bakhala kuJehova bathi, “Senze isono kuwe, sadela uNkulunkulu wethu sakhonza oBhali.”

11 UJehova waphendula wathi, “Lapho amaGibhithe, lama-Amori, lama-Amoni, lamaFilisti, 12 lamaSidoni, lama-Amaleki kanye lamaMowani ayelicindezela lakhulekela usizo kimi, kanje kangilihlenganga ezandleni zawo na? 13 Kodwa selingidelile lakhonza abanye onkulunkulu, ngakho angisayikulisindisa.

14 Hambani liyekhala kubonkulunkulu elibathembileyo. Kabalisindise nxa seliphakathi kokuhlupheka!”

15 Kodwa abako-Israyeli bathi kuJehova, “Senze isono. Yenza kithi lokho okubona kulungile kuwe, kodwa ake usihlenge khathesi nje.” 16 Ngakho basusa onkulunkulu bezizweni phakathi kwabo bakhonza uJehova. Wayengeke alumele futhi usizi luka-Israyeli.

17 Kwathi ama-Amoni esebizelwe empini njalo emise eGileyadi, ama-Israyeli abuthana amisa eMizipha. 18 Abakhokheli babantu baseGileyadi bathi omunye komunye, “Lowo ozaqalisa ukuhlasela ama-Amoni uzakuba yinduna yabo bonke abahlala eGileyadi.”